U Phan thiang ïa uba la tip kum u “Sohlah Karo” ha ka ktien Umroi u long u jait phan uba la ju rep tang ban ïoh ban pynlong jynbam dihsha. Hynrei lada phi tip pat ïa ka rukom im jong ki Bhoi Umroi ka long shisha kaei kaei kaba sngewtynnat shibun namarba ïa une u “Sohlah Karo” ki ju pyndonkam ruh ha kaban shet jyntah.
Ki Jait Phan Thiang ne “Sohlah Karo”:
Une u “Sohlah Karo” u don ar jait.
1) Uba Kham Met Bad Sngaid Bad Rben Snep. Une u dei uba ki ju shet ban dihsha bad ban shet jyntah. U long uba rben snep bad bun pnur (latex). Une u jait u don ar rong i) Rong lieh ii) Rong lymsaw.
Ka Rukom Shet:
Lada phi kwah ban shet ban dihsha donkam ban shu phon beit ha u khiew stil (steel) khnang ban dup suk ban sait namarba u mih pnur. Ai um duna ïa ka jingbun ka jong u. Tang ka jingthnam ruh kan pynih ïa u. Wat ai um shidap. Pynmeh bha ka ding bad sa dung da u narsuh ban tip lada u lah jem ne em. Lada u ih palat un ym phuh shuh. Hynrei ka shong pat ruh ha ka jingkwah bam ka jong phi ban shet jem ne tang kat ban biang.
Lada phi kwah pat ban shet jyntah phi donkam ban ot rit pyllon kum ki shaka (slice). Nangta pat sa thep ha ka um ba lah pynthnam bad sa ai shynrai, u Jasat lane u sla jaïur ba un kham bang.
2) Uba Kham Jrong Bad Stang Snep. Ïa une u jait phan la shu pyndonkam ïa u tang ha kaban shu shet ban dihsha. U long ruh uba thiang bha bad ki nong Umroi ki khot ïa une u jait da u “Sohlah Shini” lane u "Sohlah Myndai" namarba u thiang kum ka shini (sugar). Une um da don bun ka pnur (latex) hynrei lada phi peit bha u kham long um, bad phi sngewthuh bha tang lada phi bam im ïa u namarba u long kum u sohphlang.
