Napdeng bun ki jait jhur kiba ngi shem ha ki pynthor kba lane ki lyngkha bad ha ki rud wah (ki khap), une u jait jhur uba la tip bad ju khot ki nong Umroi da u Rming Dohthli, u long ban bam im da kaba shu khleh lang bad ka Tungtap.
Ka rong ka rup ka jong u ka long jyrngam-stem najrong bad ka long lam-saw (maroon) na ka bynta ba napoh.
Kheit tang najan kliar lane tang ki sla kiba kham lung ban pyndonkam.
Ka Rukom Khleh Bad Ka Rukom Bam: Ot rit bha katkum ka jingbit ka jong phi ïa une u Rming Dohthli, nangta pat sa buh lang ha ka pliang ne bul ba buh Tungtap ba lah dep thang bad kaba lah dep ban ot lang bad u piat khnang ban dup sma iwbih bha. Nangta pat sa khleh lang ha kajuh ka por.
Ka rukom ba phin khleh lang ka long da kaba shu khñiot da ka kti ym da ka shamoit ne ka siang. Da kaba phi khleh da ka kti kan pynbang ïa ka rukom pynkhreh bad ka jingmad katkum ka rukom bam ki Bhoi Umroi.
