Une u dei u jait soh uba ngi ju ioh tang ha ka aiom Tlang bad la ju suh ha u thri bad ban thad sngi haduh ba un da tyrkhong bha.
Ban bam ha ka por ba u dang im te ym ju bha namar phin sa buaid bad kan sa katah ia ka jingkoit jingkhiah bad kan sa buh ia phi hapdeng ka jingma. Kum ka jingbatai bad ka jinghikai ia phi, thad sngi ia une u sohmatan la kumno kumno haduh ba un da long kum ha kane ka dur kaba phi iohi ruh ka lah biang ba phin bam ia u. Kane ka long kum shibynta ban pynneh pynsah ia ki soh na ka bynta ban ioh bam ha ki aiom ban dang wan nadien jong ka Tlang.
Ka Rukom Bam:
Ia une u sohmatan la ju bam lang bad ka mluh ba la khleh lang bad u sohmynken uba la dep dung. Don ruh kiba ju khleh lang bad u soh-heh (soh-bol), u tyrso im. Phi dei ban kynmaw barabor ha shuwa ba phin bam ia une u jait soh phi dei ban da weng shuwa ia i bynta barit iba don ha u shyieng/ symbai iba long tylli kat i khlieh kyndok jympruid; namar lada phi ioh ban bam lang phin sa buaid bad prie long kumba phi ban ia u snep phan-dieng. Hadien ba la dep weng pat un ym lei lei shuh.
Jingpyndonkam Bad Pynkhreh:
Ki khynnah rit ki ju sngewtynnat bha ban shna shaka (tyre) kali kai bad ban lehkai ia une u soh ha ka por ba u dang im kumba ki ju leh ia u syntiew stem. Hynrei ban bam te dei tat ynda u la sdang ban ih kum ha katai ka dur ba la pyni haneng, lum bad sait shuwa ia u nangta sa suh ha u thri bad sa thad sngi. Lada u kham tyrkhong ruh u long hi ban bam lait noh sa tang lada u sdang don ki dak ki shin ba u phuh tit (fungus) te ym long shuh ban bam.
