Uei
une u Sohmatait? Ha Umroi jong ngi, ngi shem ba u don une u jait soh ïa uba la tip
kyrteng kum u “Sohmatait”. Une u soh u ïasyrïiem ïa u Sohphan (Jackfruit)
hynrei pat u rit kum ka bol kriket (cricket ball) bad u lah ruh ban heh malu
mala ban ïa ka. Ka jingheh ka jong u ka long hi tang shikham kti u rangbah. U
long lymjew bad thiang ruh ynda u lah ih bha. U tynrai jong u u long u diengbah
bad ki sla pat ki long ki long lam pyllun. Ha ka por ba u dang rit u long rong
stem bad ynda u lah ih pat u long rong sawbyrtem (orange colour).
Lada
wad lehse ngin sa lap ruh ba u don ha ki bynta babun jong ka Ri Bhoi District.
Ïa kata lehse lah ruh ban shem lehse ha ka Jylla jong ngi baroh kawei hi.
Hynrei, kaei kaba la pynlong ïa nga ban thoh ïa kane ka jingthoh shaphang jong
une u jait soh? Ka daw ba hakhmat eh hi ka long ba ki longdien jong ngi kin dup
tip shaphang jong u. Namar ka jingkiew stet ha ka jingroi jong ki briew, bun ki
khlaw ki btap ki lah khuid lut bad ki diengsoh ba bunjait ki lah duhjait bad
don khyndiat tylli kiba ngi dang lap hangne hangtai.
Ha
Umdohbyrthih une u soh u don ha ka kper jong ki Sylliang. Bad ïa kum kine ki
jait soh ngi dei ban pynneh pynsah bad thung bha khnang ba kin nym duh jait.
Hato
une u jait soh u long dawai ne em? Khlem pep un long dawai ka ki bun rukom bad
ïa kata yn lah ban batai bniah tang kito kiba lah ban wad bniah (research)
shaphang ka jinglong ka jong u.
Dei namar ba ngi don kum kine ki jait soh ha ki nongkyndong ba ngim ju donkam than ban thied ba ki mih ha ki kper bad ha ki khlaw ki btap.
